1 сәуір күні Мұхамеджан Тынышпаев атындағы ALT Университеті нағыз қазақ ауылының кейпіне енді! Университет аумағында киіз үйлер тігіліп, ұлттық ойындар ойналып, Наурыздың сәні мен салтанаты келіскен «Бірлік пен береке» атты ұлы той өтті.
Көш келді! Берекелі думан басталды!
Мерекенің басты көрінісі – салт аттылар мен өнерпаздардан құралған керуеннің келуі болды. Бұл көш тек көрініс емес, көне заманның рухын сезінуге мүмкіндік беретін нағыз театрландырылған қойылым еді. Көшпен бірге Қыдыр ата келіп, жақсылық пен молшылық тілеп, мерекенің шымылдығын ашты.
Керуеннің ішінде ходулистер, жонглерлер, от шашушылар, халық ансамбльдері, әжелер, батырлар мен бишілер жүрді. Әрқайсысы өз өнерін көрсетіп, жиналған қауымға тамаша көңіл-күй сыйлады.
ALT ауылы: Қазақтың көне шаһарлары қайта тірілді
Университет аумағына тігілген киіз үйлер жай ғана баспана емес, қазақтың көне қалаларының атауларымен аталды. Бұл – халқымыздың бай тарихына саяхат жасауға мүмкіндік берді. Әр үйдің есігі ашық, қонақтар кіріп, қымыз ішіп, бауырсақ жеп, қонақжай қазақтың салтын сезінді.
«Келіндер сайысы»: Әр шаңырақтың отын тұтатқан арулар
Наурыздың сәні – келіндер! Биылғы мерекеде әр құрылымдық бөлімше өз «алтын келінін» сайлап, «Келіндер сайысына» қосты. Келіндер өз өнерлерін көрсетіп, шәй құю, орамал тарту, ұлттық тағамдар дайындау сияқты сынақтардан өтті. Әрбір келін ерекше номинациямен марапатталып, арнайы сыйлықтарға ие болды.
«ALT Barysy-2025»: Нағыз батырлар белдесті
Биыл тұңғыш рет «ALT Barysy-2025» қазақ күресінен сайыс ұйымдастырылып, боз кілемде 50-ге жуық балуан күш сынасты. Көрермендер әр белдесуді қызыға тамашалап, өз фавориттеріне жанкүйер болды. Тек мықтылар ғана жеңіс тұғырынан көрініп, арнайы марапаттарға ие болды.
Ұлттық ойындар: Асық та, ләңгі де назардан тыс қалмады
Мерекелік шара барысында асық ату, ләңгі тебу, арқан тарту, қол күрес, гір көтеру сияқты ұлттық ойындар ұйымдастырылды. Бұл сайыстарға тек студенттер ғана емес, оқытушылар мен қонақтар да белсене қатысып, Наурыздың шынайы рухын сезінді.
Наурыз – жаңа жылдың бастауы!
«Бірлік пен береке» тойы ALT Университетінің ауласын нағыз қазақ ауылына айналдырды. Бұл мереке тек көңіл көтеру емес, ұлттық дәстүрді жаңғырту, тарихты тану, қазақы салт-дәстүрдің ажарын ашу болды.
Наурыз – татулық пен жаңарудың, мейірім мен молшылықтың мейрамы. ALT Университетіндегі бұл той әрбір қатысушының жүрегінде ұмытылмас естелік болып қалары сөзсіз!
