ALT Университетінің «Автотранспорттық құралдар және өмір қауіпсіздігі» (АТС және БЖД) кафедрасы National Day мерекесіне орай қазақ халқының ежелгі дәстүрі – «Тіл ашар» рәсімін өткізді. Іс-шара профессор Торғаевтың А.А немересіне арналды.
Бұл дәстүрдің басты мақсаты – баланың алғашқы сөзін, сөйлеуін қуанышпен атап өту, ізгі тілектер мен батаны арнау. Рәсім барысында қазақы салтқа сай қыз баланың тіліне бал жағылды – бұл баланың сөзі балдай тәтті, тілмар, шешен болсын деген ырымды білдіреді.
Сол сәтте үлкендер қауымы ізгі тілектерін айтып, Айаруға болашақта білімге құштар, ақылды, инабатты, тілге шешен, өнерлі азаматша болып өсуін тіледі. Сондай-ақ, оқуда табысқа жетіп, ALT университетіне оқуға түсіп, өз мамандығының үздігі, тіпті профессорлар қатарындағы ұстаз болсын деген ниетпен бата берілді.
Рәсім соңында қыз балаға кітап сыйға тартылып, білім мен даналықтың нышаны ретінде «Тіл ашар рәсіміне қатысушы» атты сертификат ALT Университетінің атынан табысталды.
Іс-шара ұлттық рухта, жылы, қуанышты атмосферада өтті. Қатысушылар арасында қазақ дәстүрлеріне арналған викториналар мен музыкалық байқаулар ұйымдастырылып, домбыра үні мен халық әндері шырқалды.
Сонымен қатар, кафедра ұжымы мен студенттер ұлттық дәстүрлерді насихаттау мақсатында қазақ халқының әдет-ғұрыптары мен салттары туралы қысқаметражды фильм түсірді. Бұл фильмде ұлттық болмысты сақтау мен ұрпаққа жеткізудің маңызы ерекше атап өтілді.
Бұл іс-шара БҰҰ-ның Тұрақты даму мақсаттарына (ТДМ) сәйкес келеді, атап айтқанда сапалы білім беруді, мәдени мұраны сақтауды және өмір бойы оқуды насихаттайды.
