2025 жылғы 16 маусымда Астанада Қытай Халық Республикасы Төрағасы Си Цзиньпиннің Қазақстанға мемлекеттік сапары аясында «Орталық Азия – Қытай» индустриялық және инвестициялық ынтымақтастық жөніндегі II Форумы өтті. Форумға екі елдің мемлекеттік органдарының, жетекші университеттерінің, ғылыми-зерттеу орталықтары мен компанияларының өкілдері қатысты.
Мұхаметжан Тынышбаев атындағы ALT Университеті Форумға белсенді қатысты. Университет атынан Президент-Ректор, Басқарма төрайымы Жармагамбетова Меруерт Советовна ресми рәсімге қатысып, екі маңызды құжатқа қол қойды:
- Үрімжі кәсіби университетімен қос дипломды білім беру бағдарламасын іске асыру туралы келісім,
- Shanghai SUS Environment Co., Ltd. компаниясымен орнықты даму және экологиялық таза технологияларды енгізу саласындағы өзара түсіністік туралы меморандум.
Қол қойылған келісімдер халықаралық ғылыми-білім беру ынтымақтастығын нығайтуға, академиялық қызметті, бірлескен зерттеулер мен инновациялық жобаларды дамытуға бағытталған. Мұндай серіктестіктердің құрылуы ALT Университетінің білім беруді интернационалдандыруға, «Бір белдеу – бір жол» сияқты жаһандық бастамаларға қатысуға және озық технологияларды білім беру мен ғылымға белсенді енгізуге стратегиялық бағдарын көрсетеді.
Құжаттарға қол қойылуы ALT Университетінің халықаралық ынтымақтастығын кеңейтудегі маңызды қадам болып, Қазақстан мен Қытай арасындағы трансұлттық білім беру және ғылыми бастамаларға белсенді қатысушы ретіндегі рөлін айқын көрсетеді.
