24 ақпанда Мұхамеджан Тынышпаев атындағы ALT Университетінде қытай мәдениеті мен Қытай Жаңа жылына арналған «Жібек жолының ортақ бастаулары – адамзаттың ортақ тағдыры» атты мерекелік концерт өтті. Іс-шараны Қытай Халық Республикасының Алматыдағы Бас консулдығы, Қытайдың Солтүстік ұлттар университетінің делегациясы және М. Тынышпаев атындағы ALT Университеті ұйымдастырды.
Концерт Қазақстан мен Қытай арасындағы мәдени алмасуды дамытуға бағытталды. Бағдарламада қытай мәдениетіне арналған қойылымдар, сондай-ақ екі ел арасындағы достықтың, өзара құрмет пен академиялық ынтымақтастықтың символына айналған студенттердің шығармашылық нөмірлері ұсынылды.
М. Тынышпаев атындағы ALT Университетінің Басқарма Төрағасы – Ректоры Меруерт Советовна Жармағамбетова өзінің құттықтау сөзінде былай деп атап өтті: «Бүгінгі іс-шара халықтарымыз арасындағы байланыстың терең философиясын көрсетеді. Ұлы Жібек жолы тарихи тұрғыда Шығыс пен Батысты тек сауда арқылы ғана емес, мәдениет, білім мен құндылықтар арқылы да байланыстырды. Бүгін біз бұл байланысты білім мен ғылым арқылы жалғастырып жатырмыз.
Іс-шараға студенттеріміз бен магистранттарымыздың қатысуы ерекше құндылық береді. Дәл солар — халықаралық байланыстарды нығайтып, елдеріміздің экономикасын дамытатын болашақ көшбасшылар мен мамандар. Олар бүгіннен бастап бір-бірінің мәдениетін түсінуге, білім алмасуға және бірлескен жобалар құруға үйренуде. ALT University академиялық алмасуларға, ғылыми бастамаларға және бірлескен білім беру бағдарламаларына ашық».
ҚХР-дың Алматыдағы Бас консулының міндетін атқарушы Люй И Қазақстан мен Қытай арасындағы стратегиялық серіктестікті іске асыру аясында екі ел арасындағы ынтымақтастықтың айтарлықтай нығайғанын баса айтты. Әсіресе білім беру және кәсіптік даярлау саласындағы өзара іс-қимыл белсенді дамуда. Гуманитарлық ынтымақтастық халықтар арасындағы дәстүрлі достықты тереңдетуге ықпал етеді, ал Қазақстан сенім мен өзара құрметке негізделген өзара тиімді халықаралық серіктестіктің үлгісін көрсетіп отыр.
Қытай делегациясының басшысы Ван Цзяньвэй Қытай мен Қазақстанның тек көрші ғана емес, сонымен бірге рухани және мәдени жағынан да жақын елдер екенін атап өтті.
Си Цзиньпиннің сөзін мысалға келтіре отырып, ол: «Қуатты жастар — ел гүлденуінің кепілі» екенін қадап айтты. Оның айтуынша, екі мемлекет арасындағы достық жастардың қолында, ал ұзақ мерзімді ынтымақтастық олардың таныстығымен, өзара түсіністігімен және бірлескен дамуымен тікелей байланысты.
Қытай Халық Республикасының Алматыдағы Бас консулдығының қолдауымен өткізілген іс-шараның мақсаты — өнерді біріктіру және екі ел жастары арасындағы байланысты нығайтуға ықпал ету.
Бүгін Солтүстік ұлттар университетінің делегациясы Қытай халықтарының мәдени әртүрлілігінің байлығын көрсететін әндер, билер және ұлттық музыкалық аспаптармен концерттік бағдарлама ұсынды. Бұл тек университеттік білім берудің нәтижесі ғана емес, сонымен қатар қазақстандық жастарды Қытайдың тілдік және мәдени мұрасымен таныстыруға деген шынайы ұмтылыс. «Білім алмасу арқылы тереңдейді, ал өркениет өзара мойындау арқылы дамиды», — деп түйіндеді Ван Цзяньвэй.
Ол өңірді дамытуға қажетті мамандарды даярлаудағы ALT Университетінің маңызды рөлін ерекше атап өтіп, университеттің білім беру бағыты мен қол жеткізген нәтижелері ынтымақтастықты нығайту үшін үлкен маңызға ие екенін айтты.
ALT University-дің қытайлық университеттермен және технологиялық компаниялармен ынтымақтастығы Қазақстан Республикасының жалпымемлекеттік басымдықтары арнасында дамып келеді.
2025 жылы Тяньцзиньдегі ШЫҰ саммиті аясында 2025 жылдың тамыз айында ALT University-ге берілген «Лу Бань шеберханасы» жобасына ерекше көңіл бөлінді. Қазақстандағы өнеркәсіптік робототехника бойынша үшінші шеберхана экономиканың жоғары технологиялық секторларында жұмыс істеу үшін мамандар даярлаудың және инновациялық инженерлік шешімдерді енгізудің маңызды білім беру және ғылыми-зерттеу платформасына айналды.
Жоба Қазақстан Республикасының Президенті Қасым-Жомарт Тоқаев пен ҚХР Төрағасы Си Цзиньпин арасындағы жоғары деңгейдегі келіссөздердің қорытындысы бойынша жүзеге асырылды. Қазақстанда үшінші Лу Бань шеберханасын құру және іске асыру туралы келісімге 2025 жылғы 31 қазанда ҚР Стратегиялық серіктестер форумы аясында қол қойылды.
ҚХР-дың Қазақстан Республикасындағы Елшісі Хань Чуньлинь 2026 жылдың қаңтарында ALT University-ге барды, бұл сенімнің жоғары деңгейін және серіктестіктің стратегиялық сипатын растады.
2025 жылдың қыркүйегінде Бейжіңде өткен ресми кездесу барысында Мемлекет басшысы Қытайдың Қазақстан үшін сенімді көрші, жақын дос және мәңгілік стратегиялық серіктес екенін атап өтті.
Қазақ-қытай өзара іс-қимылының қазіргі кезеңі академиялық алмасулардың кеңеюімен, бірлескен ғылыми жобалармен және екі ел университеттерінің біртұтас білім беру кеңістігіне интеграциялануымен сипатталады. Дәл осы тұрғыда ҚХР-дың жетекші университеттерімен және компанияларымен серіктестік ерекше маңызға ие болып, Қазақстан Республикасының мемлекеттік саясатының басымдықтарына сәйкес келеді.
