21 қаңтарда Лондонда Қазақстан Республикасының Ғылым және жоғары білім министрлігі ұйымдастырған Қазақстанның ұлттық павильонының ашылуы өтті. Қазақстан делегациясының құрамында ALT Университеті елдің 9 жетекші жоғары оқу орнының қатарында болып, білім беру технологиялары саласындағы әлемдегі ең ірі алаңдардың бірі — Bett UK 2026 – Leading EdTech көрмесінде Қазақстанды таныстырды.
Павильонда жоғары және жоғары оқу орнынан кейінгі білім беру жүйесін дамытудың негізгі бағыттары ұсынылды: оқу үдерістерін цифрландыру, жасанды интеллектке негізделген шешімдерді енгізу, ғылымды дамыту және халықаралық академиялық ынтымақтастықты кеңейту. Қазақстандық жоғары оқу орындары өздерінің білім беру бағдарламалары мен ғылыми-зерттеу әлеуетін көрсетті.
Bett Show 2026 аясында ҚР Ғылым және жоғары білім министрі Саясат Нурбек бастаған қазақстандық делегация Lenovo, Intel, Microsoft және Google сияқты жетекші әлемдік технологиялық компаниялардың басшылығымен бірқатар жұмыс кездесулерін өткізді. ALT Университетінің өкілдері Microsoft компаниясымен өткен келіссөздерге қатысып, Қазақстан жоғары оқу орындарының білім беру жүйесіне заманауи цифрлық шешімдер мен білім беру платформаларын енгізу, студенттер мен оқытушылардың цифрлық құзыреттерін дамыту, жоғары технологиялық салалар үшін білікті кадрлар даярлау және білім беру инфрақұрылымын жаңғырту мәселелерін талқылады.
Сонымен қатар қазақстандық университеттердің шетелдік компаниялармен бірлескен жобаларын іске асыру мүмкіндіктері қарастырылды: жасанды интеллект құралдарын оқу және ғылыми-зерттеу үдерісіне интеграциялау, жоғары оқу орындарында цифрлық экожүйелерді дамыту және стартап-бастамаларды қолдау.
ALT Университетінің Bett UK 2026 көрмесіне қатысуы университеттің цифрлық білім беруді дамытуға, инновациялық шешімдерді енгізуге және халықаралық ынтымақтастықты нығайтуға бағытталған стратегиялық бағытын айқындайды.
Дереккөз: gov.kz
