2026 жылғы 16 мамырда Мұхамеджан Тынышпаев атындағы ALT University-де «Suret Design» білім беру орталығының түлектері — «Алтын белгі» төсбелгісінің иегерлеріне Басқарма төрағасы – Ректордың толық оқу кезеңіне арналған 24 білім беру грантын салтанатты түрде табыстау рәсімі өтті.
Бұл шара жоғары академиялық дайындық, мақсатқа ұмтылыс және кәсіби дамуға деген ынта көрсеткен дарынды түлектер үшін маңызды оқиға болды. Гранттар бөлу дарынды жастарды қолдауға және олардың сапалы жоғары білім алуына мүмкіндік жасауға бағытталған.
ALT University-де атап өткендей, «Алтын белгі» иегерлерін қолдау — мықты академиялық қауымдастықты қалыптастыру және болашақта креативті индустрия, инженерия, технология мен экономиканың басқа да басым бағыттарын дамытуға үлес қоса алатын кәсіби мамандардың жаңа буынын тәрбиелеу жөніндегі жүйелі жұмыстың бір бөлігі.
Университет студенттердің заманауи білім алып қана қоймай, өздерінің шығармашылық әрі зияткерлік әлеуетін ашуына, жеке идеяларын жүзеге асыруына және инновациялық жобаларға қатысуына жағдай жасайтын ортаны дамытуға ерекше көңіл бөледі.
«Suret Design» білім беру орталығы көптеген жылдар бойы дарынды мектеп оқушыларын даярлаумен және жастардың шығармашылық қабілеттерін дамытумен айналысып келеді. Осы орталықпен серіктестік — университеттің ынталы әрі мықты талапкерлерді тәрбиелеуге бағытталған білім беру ұйымдарымен өзара іс-қимылын нығайтудағы кезекті қадамы болды.
Салтанатты шара барысында болашақ студенттерге оқу сертификаттары табысталып, ALT University-дің білім беру ортасының мүмкіндіктері, соның ішінде заманауи оқу бағдарламалары, халықаралық бастамалар, студенттік жобалар мен университеттің инфрақұрылымы таныстырылды.
Университет басшылығы мұндай бастамалар дарынды жастарды тарту, жоғары білім сапасын арттыру және болашақтың бәсекеге қабілетті мамандар буынын қалыптастыру жөніндегі стратегияның маңызды бөлігі екенін жеткізді.
