2026 жылғы 15–17 қазан аралығында Қытай Халық Республикасының Тяньцзинь қаласында Кәсіптік және техникалық білім беруді дамыту жөніндегі дүниежүзілік конференция өтті.
Халықаралық іс-шараға Мұхамеджан Тынышбаев атындағы ALT University Басқарма Төрағасы – Ректоры Меруерт Советқызы Жармағамбетова және Халықаралық Байланыстар жөніндегі Басшы Аян Нұрланұлы қатысты.
Конференцияны Қытай Халық Республикасының Білім министрлігі, ЮНЕСКО істері жөніндегі Қытай Халық Республикасының Ұлттық комиссиясы және Тяньцзинь қаласының халық үкіметі ұйымдастырды. Биылғы конференция «ТжКБ: өзгерістерді қабылдау, стандарттарды қалыптастыру және ортақ болашақ құру» тақырыбына арналды.
Іс-шара бағдарламасы ашылу салтанатын, пленарлық отырысты, министрлердің дөңгелек үстелін, параллель сессиялар мен қорытынды отырысты қамтыды. Қатысушылар кәсіптік және техникалық білім беруді дамытудың жаңа үрдістерін, халықаралық стандарттарды қалыптастыруды, жоғары білікті мамандар даярлауды және білім беру саласындағы орнықты халықаралық ынтымақтастықты кеңейтуді талқылады.
Конференция аясында кәсіптік білім беру сапасын арттыруға, білім мен өндіріс арасындағы байланысты нығайтуға, болашаққа бағдарланған құзыреттерді дамытуға және халықаралық тәжірибе алмасуға ерекше назар аударылды.
ALT University делегациясының халықаралық конференцияға қатысуы университеттің жаһандық академиялық байланыстарын кеңейтуге, кәсіптік және инженерлік білім беру саласындағы озық тәжірибелерді зерделеуге, сондай-ақ шетелдік білім беру ұйымдарымен ынтымақтастықтың жаңа бағыттарын қалыптастыруға мүмкіндік берді.
ALT University-дің халықаралық конференцияға қатысуы БҰҰ-ның Тұрақты даму мақсаттарын іске асыруға ықпал етеді: білім беру бағдарламаларын жетілдіру және кәсіби құзыреттерді дамыту арқылы 4-мақсат «Сапалы білім», білім мен өндіріс арасындағы байланысты нығайту және білікті инженер кадрларын даярлау арқылы 9-мақсат «Индустрияландыру, инновациялар және инфрақұрылым», сондай-ақ халықаралық ынтымақтастықты кеңейту және озық білім беру тәжірибесімен алмасу арқылы 17-мақсат «Тұрақты даму жолындағы әріптестік».
ALT University халықаралық әріптестікті дамытуды, білім беру бағдарламаларын еңбек нарығының заманауи талаптарына бейімдеуді және бәсекеге қабілетті инженерлік кадрлар даярлауды жалғастырады.
