Кәсіби бағдар беру жұмыстары аясында ALT University студенттері университет түлегі, Алматы қаласындағы «DGC Alatay» ЖШС директоры Андрей Васильевпен сұхбатқа қатысты.
Сұхбат барысында Андрей Васильев компанияның қызметі, негізгі жұмыс бағыттары, жүзеге асырылып жатқан жобалары және кәсіпорынның даму перспективалары туралы әңгімеледі. Студенттер саладағы еңбек ерекшеліктері, жұмыс берушілердің талаптары және қазіргі еңбек нарығында сұранысқа ие құзыреттер жөнінде құнды ақпарат алды.
Сұхбатта кәсіби және мансаптық даму мәселелеріне ерекше назар аударылды. Андрей Васильев компаниядағы мансаптық өсу сатылары, біліктілікті арттыру мүмкіндіктері және жас мамандар үшін ашылатын перспективалар туралы айтып берді. Ол ALT University түлектерінің кәсіби дайындығын жоғары бағалайтынын және компанияның өз саласында дамуға ұмтылатын талантты жас мамандарды жұмысқа қабылдауға мүдделі екенін атап өтті.
Сұхбат кәсіпорын бойынша таныстыру экскурсиясымен жалғасты. Бұл студенттерге компания қызметі туралы ақпарат алып қана қоймай, өндірістік үдерістерді өз көздерімен көруге мүмкіндік берді. Осындай формат студенттердің үлкен қызығушылығын тудырып, болашақ мамандықтарының ерекшеліктерін тереңірек түсінуге ықпал етті.
Табысты түлектермен өткізілетін осындай сұхбаттар студенттердің таңдаған мамандығын жақсырақ түсінуіне, кәсіби өсу мүмкіндіктерін көруіне және өз саласында жетістікке жетуге ынталануына көмектеседі. Түлектердің жетістік тарихы университетте алынған білімнің кәсіби мақсаттарға жетудегі маңызды негіз екенін көрсетеді.
Автор: Бимагамбетова Л. Н.
