Жыл сайын 17 мамырда әлемдік қауымдастық Халықаралық электр байланысы одағы (International Telecommunication Union) бекіткен және БҰҰ тарапынан танылған Дүниежүзілік электр байланысы және ақпараттық қоғам күнін атап өтеді. Бұл атаулы күн 1865 жылы жаһандық телекоммуникация жүйесінің дамуына негіз салған бірінші Халықаралық телеграф конвенциясына қол қойылуымен байланысты. Қазіргі жағдайда телекоммуникациялық технологиялар цифрлық инфрақұрылымды қалыптастыруда маңызды рөл атқарып, экономиканың, ғылым мен білімнің тұрақты дамуын қамтамасыз етеді. Байланыс желілерін, деректерді беру жүйелерін, спутниктік технологиялар мен заттар интернетін (IoT) дамыту зияткерлік көлік жүйелерін, цифрлық қызметтерді және инновациялық өндірістік шешімдерді құрудың негізіне айналуда.
Осы халықаралық күнді атап өту барысында білім беру және ғылыми ұйымдар радиотехника, электроника және телекоммуникациялармен байланысты инженерлік даярлық бағыттарының маңыздылығына ерекше назар аударады. Бұл үдерісте заманауи коммуникациялық технологияларды әзірлеуге және енгізуге қабілетті болашақ мамандардың құзыреттілігін қалыптастыратын университеттердің рөлі зор. М. Тынышпаев атындағы ALT Университетінде телекоммуникация және цифрлық технологиялар саласындағы мамандарды даярлау «Радиотехника және телекоммуникациялар» кафедрасында жүзеге асырылады. Білім беру үдерісі байланыс желілерін, цифрлық деректерді беру жүйелерін, заттар интернеті технологияларын және көліктің зияткерлік инфрақұрылымын жобалау саласындағы практикалық дағдыларды дамытуға бағытталған.
Дөңгелек үстел аясындағы талқылауға кафедраның профессор-оқытушылар құрамы, докторанттар, магистранттар мен студенттер, сондай-ақ Satbayev University-дегі әріптестер — PhD докторы, профессор Нұржігіт Құралбайұлы Смайылов және қауымдастырылған профессор Қырмызы Нұрлановна Тайсариева; Energo University профессоры, т.ғ.к. Мұратбек Мәдәліұлы Ермекбаев; ХАТУ-дағы әріптестер — т.ғ.к., қауымдастырылған профессор Елена Әжібекқызы Бахтиярова, т.ғ.к., профессор Алтай Зуфарұлы Айтмағамбетов және «Қазақтелеком» АҚ «Желі» дивизионы бірлестігінің пайдалану жөніндегі директоры Ғазинур Жолдыбекұлы Райымханов қатысты.
Қатысушылар цифрлық коммуникацияларды дамытудың заманауи тенденцияларын, киберқауіпсіздік мәселелерін, 5G және заттар интернеті технологияларын енгізуді, сондай-ақ инфрақұрылымды цифрлық трансформациялау жағдайында зияткерлік көлік жүйелерін қолдану перспективаларын талқылады. Жаңа буын инженерлік кадрларын даярлау, студенттердің зерттеушілік қызметін дамыту және университеттің байланыс саласы мен IT-сектор өкілдерімен өзара іс-қимылы мәселелеріне ерекше назар аударылды. Дискуссия барысында ақпараттық қауіпсіздікті қамтамасыз етудің, желілік инфрақұрылымның тұрақтылығын және цифрлық қызметтердің сапасын арттырудың өзекті мәселелері қаралды.
Бұл халықаралық күн БҰҰ-ның Тұрақты даму мақсаттарының 9-мақсаты — «Индустрияландыру, инновациялар және инфрақұрылым» бағытын іске асырумен тікелей байланысты. Ол тұрақты әрі инновациялық инфрақұрылымды дамытуға, ақпараттық-коммуникациялық технологияларға қолжетімділікті кеңейтуге және ғылыми-технологиялық прогресті ынталандыруға бағытталған. Телекоммуникация саласында білікті инженерлер мен зерттеушілерді даярлау заманауи цифрлық экономиканы дамытуға және жаһандық ақпараттық байланысты нығайтуға ықпал етеді. Осылайша, Дүниежүзілік электр байланысы және ақпараттық қоғам күні инженерлік мамандықтарды дәріптеуге, ғылыми біліммен алмасуға және цифрлық болашақтың негізін қалайтын телекоммуникациялық технологияларды дамыту перспективаларын талқылауға арналған маңызды алаң қызметін атқарады.
