Select Page

2026 жылғы 11 қарашада ALT University Компьютерлік ғылымдар департаментінде «Банк секторын цифрлық трансформациялау: бизнес-процестерді автоматтандыру және Colvir платформасында IT-жобаларды іске асыру» тақырыбында қонақ дәріс өтті.

Дәрісті «Нұрбанк» АҚ өкілдері — Алматы қаласындағы филиал директоры Джасенов Сакен Фатыханович және Банктік технологиялар департаментінің директоры Акчалова Айжан Ермековна өткізді. Спикерлер банк қызметін цифрландыру тәжірибесімен бөлісіп, IT-мамандардың қаржы ұйымдарының технологиялық дамуына қосатын үлесі туралы әңгімеледі.

Кездесу барысында бизнес-процестерді автоматтандыру және банктік ақпараттық жүйелерді дамыту мәселелері қарастырылды. Colvir жүйесінің мысалында клиенттерге қызмет көрсету, шоттарды жүргізу және операцияларды өңдеу процестерінің қалай автоматтандырылатыны түсіндірілді. Сондай-ақ әзірлеушілердің жаңа модульдер құру, жүйенің функционалын жетілдіру және оны банктің басқа цифрлық сервистерімен біріктіру бойынша міндеттері талқыланды.

Colvir жүйесімен 20 жыл бойы жұмыс істеп, банктік жүйелерді дамыту және сүйемелдеумен айналысып келе жатқан Айжан Ермековнаның тәжірибесі дәрістің практикалық мазмұнын толықтырды. Оның кәсіби тәжірибесі банктік технологиялар саласындағы IT-мамандардың күнделікті міндеттерін түсінуге мүмкіндік берді.

Дәріс тақырыбы БҰҰ-ның Тұрақты даму мақсаттарына, атап айтқанда 4-ТДМ «Сапалы білім» және 9-ТДМ «Индустрияландыру, инновациялар және инфрақұрылым» мақсаттарына сәйкес келеді. Кездесу білім алушылардың кәсіби құзыреттерін дамытуға және заманауи цифрлық технологиялардың қаржы инфрақұрылымындағы рөлін түсінуге бағытталды.

Мұндай кездесулер студенттерге теориялық білімдерін кәсіби тәжірибемен байланыстыруға, банк саласындағы IT-жобалардың ерекшеліктерімен танысуға және болашақ мамандығының қолданылу аясын кеңірек түсінуге көмектеседі.

Сакен Фатыханович пен Айжан Ермековнаға қонақ дәріске қатысып, кәсіби тәжірибелерімен бөліскені үшін алғыс білдіреміз!

Автор: Өмірбекова З. М.

Skip to content
Приемная комиссия