2026 жылғы 15 қарашада ALT University Компьютерлік ғылымдар департаментінің студенттері Назерке Жамбыл, Томирис Нурсаидова, Асыл Ишан және Нұрдәулет Мықтыбай «Jeti Alma» командасының құрамында Women Who AI Buildathon хакатонында бірінші орын алды. Команда әйелдер денсаулығына арналған технологиялар саласында (femtech) жасанды интеллектке негізделген жоба әзірледі. Хакатонға 100 команда қатысып, оның үшеуі жүлделі орындарға ие болды. Жалпы жүлде қоры 1 000 АҚШ долларын құрады. Әр жүлдегер команда 333 АҚШ долларын (шамамен 150 000 теңге) алды.
Бір күндік хакатон Алматыдағы Нархоз университетінде өтті. Тәлімгерлердің қолдауымен қатысушылар әйелдер денсаулығына арналған ЖИ негізіндегі өнімдердің прототиптерін әзірлеп, оларды қазылар алқасына таныстырды. Хакатон әйелдер денсаулығы мен әйелдер қауымдастықтарын қолдауға арналды.
«Jeti Alma» командасы Қазақстандағы пайдаланушыларға арналған әйелдер денсаулығы жөніндегі Lunia қосымшасының прототипін таныстырды. Қосымшада eGov арқылы жүйеге кіру, денсаулық күнделігін жүргізу және симптомдар сауалнамасы негізінде медициналық көмекке қаншалықты шұғыл жүгіну қажет екенін алдын ала бағалау қарастырылған. ЖИ көмекшілері денсаулық пен тамақтану бойынша анықтамалық ақпарат береді.
Қосымша пайдаланушыларға талдау нәтижелерін түсінуге, дәрігер қабылдауына жазылуға және қажет болған жағдайда 103 нөмірі арқылы жедел жәрдем шақыруға көмектесуге арналған. Жобада сондай-ақ қарым-қатынас жасауға арналған бөлім, дербес деректерді қорғау және қазақ пен орыс тілдерін қолдау қарастырылған.
Жоба тақырыбы БҰҰ-ның Тұрақты даму мақсаттарына, атап айтқанда «Жақсы денсаулық және әл-ауқат» атты 3-ТДМ мен «Индустрияландыру, инновациялар және инфрақұрылым» атты 9-ТДМ-ға сәйкес келеді. Жоба жасанды интеллектіні әйелдер денсаулығына арналған технологияларда қалай қолдануға болатынын көрсетті.
Команданы жеңісімен құттықтаймыз және жобаны одан әрі дамытуда сәттілік тілейміз!
Автор: Өмірбекова З. М.


