Педагогикалық практика аясында D11362 – «Салалар бойынша логистика» білім беру бағдарламасының 1-курс докторанттары Төлеген Мұхтар мен Саликов Асхат «Көлік қызметтері және бизнес» кафедрасының білім алушыларына арналған оқу іс-шарасын өткізді.
Сабақ барысында көлік-логистика саласындағы суды ұтымды пайдалану тақырыбы тұрақты даму және заманауи сын-қатерлер тұрғысынан қарастырылды. Негізгі назар БҰҰ-ның Тұрақты даму мақсаттарының 6-мақсаты — «Таза су және санитария» бағытына аударылды.
Іс-шараның ерекшелігі – логистикадағы судың «жасырын ресурс» ретінде қарастырылуы, яғни ол саланың тиімділігіне тікелей әсер етсе де, басқару үдерістерінде жиі ескерілмейді. Сабақтың мақсаты – студенттерде логистикалық процестердегі судың рөлі туралы түсінік қалыптастыру және су тұтынуды талдау мен оңтайландыру бойынша практикалық дағдыларды дамыту.
Теориялық бөлімде көлік инфрақұрылымында суды пайдалану мысалдары қарастырылды: автокөлік пен теміржол жылжымалы құрамын жуу, көлік-логистикалық орталықтар мен әуежайларды пайдалану. Қазақстан үшін бұл мәселенің өзектілігіне ерекше назар аударылды, себебі елде су ресурстары шектеулі және трансшекаралық су көздеріне тәуелділік жоғары.
Практикалық бөлім командалық жұмыс форматында өтті. Қатысушылар консалтингтік топтар ретінде су тұтынуды операциялық қызметті тоқтатпай азайту бойынша шешімдер әзірледі. Студенттер есептеулер жүргізіп, технологиялық және ұйымдастырушылық ұсыныстар беріп, олардың экономикалық тиімділігін негіздеді.
Іс-шара қорытындысы бойынша білім алушылар логистикалық процестерді ресурстық тұрғыдан талдау дағдыларын меңгерді, water footprint бағалаудың негізгі тәсілдерін игерді, шығын аймақтарын анықтауды және тиімді шешімдер ұсынуды үйренді. Өткізілген практикум тұрақты даму қағидаларын бизнес-процестерге енгізудің маңыздылығын көрсетті.
