2026 жылғы 26 ақпанда Мухамеджан Тынышпаев атындағы ALT Университетінде Ғылыми кеңестің кезекті мәжілісі өтті. Шара Қазақстан Республикасының көлік-коммуникация кешені мен білім беру жүйесін дамытуға өлшеусіз үлес қосқан кәсіби мамандарды ұлықтауға арналған салтанатты рәсіммен ерекшеленді.
Марапаттау рәсімін Басқарма Төрағасы-Ректор, экономика ғылымдарының докторы Жармағамбетова Меруерт Советқызы жүргізді.
Еліміздегі жерасты құрылысы мен метрополитенді дамыту мәселесіне ерекше көңіл бөлінді. Отандық метро құрылысының қалыптасуына қосқан елеулі үлесі үшін келесі тұлғаларға «Құрметті профессор» дипломы табыс етілді:
Өкшебаев Мұратбай Таңқыбайұлы — «Bazis Constructions-basis Metro» ЖШС филиалының директоры;
Құлбаев Мұратбек Нағиметұлы — техника ғылымдарының кандидаты, «Метропроект» ЖШС директоры.
Бұл атақтарды беру университет пен индустрия флагмандары арасындағы тығыз байланысты және жаңа буын инженерлік кадрларды даярлаудағы практик мамандардың еңбегін тануды айғақтайды.
Көпжылдық жемісті еңбегі және жоғары білікті мамандардың шоғырын тәрбиелеудегі белсенділігі үшін ALT Университетінің ардагері, техника ғылымдарының докторы, профессор Исаханов Еркін Абдурашидұлы жоғары марапатқа ие болды. Оған «Даңқты құрылысшы» құрмет белгісі мен дипломы табыс етілді. Бұл марапат профессордың тәуелсіз Қазақстанның құрылыс саласын нығайту ісіндегі ерен еңбегіне берілген лайықты баға болып табылады.
Техникалық реттеу және метрология жүйесін дамытуға қосқан елеулі үлесі үшін «ҚазСтандарт» РМК атынан «Құрметті стандарттаушы» төсбелгісімен профессор Жайлаубеков Еркін Алмағамбетұлы марапатталды. Сарапшылар қауымдастығы оның нормативтік базаны жетілдірудегі және отандық экономиканың бәсекеге қабілеттілігін қамтамасыз ететін жаңа стандарттарды енгізудегі белсенді рөлін атап өтті.
ALT Университетінің ұжымы марапат иелерін шын жүректен құттықтайды! Сіздерге кәсіби табыс, мықты денсаулық және көлік ғылымы мен білімін өркендету жолында сарқылмас қуат тілейміз!
