«Шектеусіз қозғалыс»: шабыт пен жігерге толы кездесу
«ӘГП және ДТ» кафедрасының ұйымдастыруымен ерекше әрі мағыналы шара – «Шектеусіз қозғалыс» атты кездесу өтті. Іс-шараның басты мақсаты – жастарға мотивация сыйлап, оларды спортқа деген қызығушылығын арттыру, сондай-ақ мүмкіндігі шектеулі жандардың ерік-жігеріне, қайсарлығына деген құрметті нығайту болды.
Кездесуге төрт бірдей Паралимпиада жүлдегері, екі кәсіби жаттықтырушы және дене мүмкіндігі шектеулі азаматтарға арналған «Алматы» спорт клубының өкілдері арнайы шақырылды. Олар өздерінің өмірлік тәжірибелерімен, спорттағы қиындықтары мен жетістіктері жайлы әсерлі әңгімелер айтып, студенттермен шынайы пікір алмасу жүргізді.
Шара барысында чемпиондарға түрлі сұрақтар қойылып, олардың табандылығы, төзімділігі мен биік мақсаттарға ұмтылысы көпшілікке үлкен әсер қалдырды. Қатысушылар Паралимпиада жүлдегерлерінің әңгімелерінен шабыт алып, адам рухының мықтылығы мен мүмкіндіктің шексіз екеніне көз жеткізді.
Кездесу жылы әрі еркін форматта өтті. Студенттер мен спортшылар арасында өзара сенім мен қолдау орнап, бұл басқосу тек қана мотивациялық іс-шара емес, жүректерге үміт пен сенім ұялатқан ерекше сәтке айналды.
Осындай кездесулер – жастардың санасына тек спорттағы ғана емес, өмірдегі де күрескерлік пен қайсарлықты дарытатын, оларды биік белестерге жетелейтін маңызды қадам.
