Ағымдағы жылдың 27 қараша күні ALT Университетінде жастардың цифрлық мәдениетін көтеруге бағытталған тағылымды кездесу өтті. Алматы қаласы бойынша Экономикалық тергеп-тексеру департаментінің қызметкерлері студенттерімізге заманауи қауіптер мен олардан қорғанудың жолдары жайлы мазмұнды дәріс оқыды.
Бұл шара «Заң мен тәртіп» қағидатын жүзеге асыру аясында ұйымдастырылып, қазіргі қоғамда жиілеген цифрлық және қаржылық алаяқтықтың алдын алуға, жастардың құқықтық сауаттылығын арттыруға бағытталды.
Қаржы мен ақпараттың құны арта түскен дәуірде қауіпсіздіктің әр қыры маңызды. Осы мақсатта департамент мамандары қаламыздағы жоғары оқу орындарында арнайы лекциялар циклын өткізіп, жас буынға киберкеңістікте өзін қорғау мәдениетін, күмәнді ақпаратты ажырату дағдыларын, қаржылық сауаттылықтың негізгі қағидаттарын түсіндіруде.
ALT Университетінде өткен бұл кездесуде студенттер нақты мысалдар арқылы цифрлық қауіпсіздіктің мәнін терең түсініп, саналы қоғам құрудағы өз рөлін сезінді.
Жастардың білімді, қауіпсіздік мәселесіне ұқыпты, цифрлық ортада жауапкершілікті болуы – ел болашағының берік кепілі.
