2025 жылдың 18 желтоқсанында Тәрбие және әлеуметтік жұмыс департаментінің ұйымдастыруымен Тұрақты даму мақсаттарын (ТДМ) жүзеге асыру аясында «Заң мен Тәртіп» тақырыбында студенттермен маңызды кездесу өтті. Іс-шара ҚР Ішкі істер министрлігіне қарасты Мақан Есболатов атындағы Алматы академиясының қызметкерлері мен курсанттарының қатысуымен өтті.
Кездесу барысында курсанттар Ілесбек Бекжан Нұрғалиұлы, Куланбек Аңсар Берікұлы, Амиргумар Ералы Асенұлы, Шыналы Айзат Бағдатқызы, Балтабай Іңкәр Ерқанатқызы студенттермен өздерінің тәжірибелерімен бөлісіп, әкімшілік-құқықтық тәртіп, құқықбұзушылықтың алдын алу, жастар арасындағы құқықтық сауаттылықты арттыру сынды маңызды тақырыптарды талқылады. Сонымен қатар, ішкі істер органдарының құрылымы мен қызметі туралы, құқық қорғау саласындағы қызметтің ерекшеліктері жайында толық ақпарат берілді.
Кездесуге “Жалпы инженерия” кафедрасының оқытушылары, сондай-ақ «Автомобиль жолдары мен аэродромдар құрылысы», «Машина жасау», «Жылжымалы құрам инженериясы» білім беру бағдарламаларының студенттері белсенді қатысып, қызығушылық танытты. Студенттер өздерін толғандырған сұрақтарын қойып, құқықтық нормалар мен тәртіптің маңыздылығы жайлы пікір алмасты.
Іс-шара тәрбиелік, ақпараттық және танымдық мәнге ие болды. Кездесу жастардың азаматтық белсенділігін арттырып, құқықтық мәдениетті қалыптастыруда және Тұрақты даму мақсаттарының бірі – бейбітшілік, әділет және тиімді институттарды нығайту бағыты бойынша маңызды қадам болды.
