2026 жылғы 12 қаңтарда Университетте Жас оқытушылар мектебінің қатысушыларына арналған оқу-әдістемелік семинар өтті. Іс-шараға еңбек өтілі бес жылға дейінгі жас педагогтер қатысты.
Семинарды Жас оқытушылар мектебінің жетекшісі Нурахметова К.К. және Академиялық жоспарлау және бақылау офисінің бас маман-сарапшысы Бактыбаева К.С. ұйымдастырды.
Кездесу барысында ағымдағы кезеңнің ерекше маңыздылығы атап өтілді: 2026 жыл Мемлекет басшысы тарапынан Жасанды интеллект және цифрландыру жылы деп жарияланды. Қатысушыларға цифрлық трансформацияның жай ғана өзекті тренд емес, білім беру жүйесін дамытудың стратегиялық басымдығы екені еске салынды. Жас оқытушылар студенттерді жоғары технологиялы және жылдам өзгеретін ортада жұмыс істеуге дайындау мақсатында оқу үдерісіне жасанды интеллект элементтерін белсенді түрде енгізуі қажет.
Аталған бастамалар Тұрақты даму мақсаттарының №4 — «Сапалы білім» мақсатына сәйкес келеді, себебі олар білім беру тәжірибелерін жаңғыртуға, оқыту сапасын арттыруға және студенттерді цифрлық экономика жағдайында білім алуға және кәсіби қызметке даярлауға бағытталған.
Семинарда оқу сабақтарының әдістемелік жаңартылуына ерекше көңіл бөлінді. Қазіргі заманғы білім беру үдерісі тек дәстүрлі оқыту формаларымен шектелмеуі тиіс екені атап өтілді.
Сабақ өткізудің негізгі талаптары ретінде мыналар белгіленді:
- Интерактивтілік — интерактивті тақталар мен мультимедиялық технологияларды белсенді пайдалану.
- Топтық жұмыс — коммуникативтік дағдыларды және бірлескен мәселелерді шешу қабілеттерін дамыту мақсатында командалық оқыту формаларын, пікірталастар мен кейс-тапсырмаларды енгізу.
- Белсенді оқыту әдістері — студентті пассивті тыңдаушыдан білім беру үдерісінің белсенді қатысушысына айналдыратын инновациялық педагогикалық тәсілдерді қолдану.
Сондай-ақ жас әріптестердің Университеттің Кітапханалық-ақпараттық орталығына тұрақты түрде барып тұруының маңыздылығы атап өтілді. Оқытушы соңғы ғылыми зерттеулер мен жаңалықтардан хабардар болуы тиіс. Кітапхана қорында ұсынылған өзекті салалық журналдар мен академиялық басылым материалдарын пайдалану оқу мазмұнының заманауилығын қамтамасыз етудің міндетті шарты болып табылады.
Қорытындылай келе, ұйымдастырушылар семинардың жас оқытушылардың кәсіби қалыптасуындағы маңызды кезең болғанын атап өтті. Университет жаһандық цифрландыру жағдайында жас оқытушыларды қолдауға бағытталған жүйелі жұмысты жалғастырып, олардың шығармашылық және кәсіби өсуіне жағдай жасауда.
