6B06116 «Ақпараттық жүйелер» білім беру бағдарламасының 2-курс студенттері Алматы қаласындағы М.О. Әуезовтің әдеби-мемориалдық мұражай-үйіне танымдық экскурсия жасады. Бұл мәдени-танымдық іс-шара студенттердің тарихи-мәдени мұраларға деген қызығушылығын арттыруға және ұлттық әдебиетті тереңірек танып-білуіне бағытталды.
Экскурсия барысында студенттер қазақ әдебиетінің көрнекті өкілі, ұлы жазушы әрі ғалым Мұхтар Әуезовтің өмірі мен шығармашылық жолы туралы құнды мәліметтермен танысты. Мұражай-үй жазушының өмірінің соңғы жылдарын өткізген тарихи мекені болып табылады. Дәл осы жерде ол өзінің әйгілі «Абай жолы» роман-эпопеясын аяқтаған.
Экскурсия кезінде студенттер жазушының жұмыс кабинетін, жеке кітапханасын, тұрмыстық заттарын, қолжазбаларын және тарихи фотосуреттерін тамашалады. Әсіресе, Мұхтар Әуезовтің шығармашылықпен айналысқан жұмыс бөлмесі студенттердің ерекше қызығушылығын тудырды. Мұражай экспонаттары арқылы студенттер жазушының өмірі мен шығармашылық мұрасын тереңірек түсінуге мүмкіндік алды.
Сонымен қатар, мұражай қызметкерлері Мұхтар Әуезовтің әдеби, ғылыми және қоғамдық қызметі, сондай-ақ оның қазақ әдебиеті мен мәдениетінің дамуына қосқан зор үлесі туралы жан-жақты ақпарат берді. Студенттер экскурсия барысында белсенділік танытып, сұрақтар қойып, ұсынылған материалдарға үлкен қызығушылық танытты.
Іс-шара соңында студенттер алған әсерлерімен бөлісіп, мұндай мәдени-танымдық экскурсиялардың дүниетанымды кеңейтудегі, рухани дамудағы және тарихи-мәдени мұраларға деген құрметті қалыптастырудағы маңызын атап өтті. Жалпы алғанда, М.О. Әуезовтің әдеби-мемориалдық мұражай-үйіне жасалған экскурсия студенттер үшін мазмұнды, пайдалы әрі есте қаларлық тәжірибе болды.
Автор: Мұратбек Т. Д.
