2026 жылғы 27 ақпанда Мұхамеджан Тынышпаев атындағы ALT Университеті мен ҚР Қорғаныс министрлігінің Радиоэлектроника және байланыс әскери-инженерлік институты арасында ынтымақтастық туралы Меморандумға қол қойылды. Меморандумның негізгі мақсаты — серіктестік қарым-қатынастарды орнату және ұзақ мерзімді, тиімді әрі өзара тиімді ынтымақтастықты дамыту, сондай-ақ ақпарат алмасуды қамтамасыз ету және бірлескен бастамаларды іске асыру.
Өзара іс-қимылдың негізгі бағыттарының қатарында қолданыстағы ынтымақтастық бағдарламалары мен жобаларын талдау, сондай-ақ оларды одан әрі іске асыру бойынша ұсыныстар дайындау үшін бірлескен жұмыс топтарын құру көзделген. Ынтымақтастық сонымен қатар бірлескен курстарды, семинарлар мен ғылыми-практикалық конференцияларды ұйымдастыру мен өткізуді, ғылыми-педагогикалық және ғылыми кадрларды қайта даярлау мен олардың біліктілігін арттыруды, оқу және ғылыми-зерттеу бөлімшелерінде профессор-оқытушылар құрамы мен ғылыми қызметкерлердің тағылымдамаларын ұйымдастыруды, сондай-ақ жетекші ғалымдарды, оқытушылар мен мамандарды консультативтік және оқытушылық қызметке тартуды қамтиды.
Кездесу аясында Басқарма төрағасы – университет Ректоры Меруерт Жармағамбетова мен жоғары оқу орнының басшылық құрамының қатысуымен кампус-тур ұйымдастырылды. Қонақтарға университеттің білім беру инфрақұрылымы: заманауи оқу аудиториялары мен мамандандырылған зертханалар, кампустың жаңартылған кеңістіктері, сондай-ақ университеттің ауқымды модернизациялау және ребрендинг нәтижелері таныстырылды. Делегация ALT University дамуының негізгі бағыттарымен, білім беру бағдарламаларымен, сондай-ақ ғылым, цифрландыру және сұранысқа ие инженерлік-техникалық мамандарды даярлау саласындағы бастамалармен танысты.
Кездесу барысында ғылымды, білімді және қолданбалы әзірлемелерді интеграциялау, ғылыми-зерттеу әлеуетін дамыту және ұлттық қауіпсіздік жүйесі мен экономиканың жоғары технологиялық салалары үшін кадрлар даярлау мәселелеріне ерекше назар аударылды.
Меморандумға қол қою азаматтық және әскери білім беру секторлары арасындағы ынтымақтастықты нығайтудағы маңызды қадам болды, ол мамандарды даярлау сапасын арттыруға және елдің ғылыми-технологиялық әлеуетін дамытуға бағытталған.
