М. Тынышпаев атындағы ALT Университеті көлік, теміржол және энергетика салаларының жетекші кәсіпорындарымен өзара ынтымақтастықты нығайту бағытындағы жүйелі жұмысын жалғастыруда. Серіктестік қатынастарды дамыту аясында Университет басшылығы мен өкілдерінің «Қамқор Локомотив», KEGOC және DAR RAIL компанияларының басшылығы және мамандарымен кәсіпорындардың аумағында жұмыс кездесулері өтті.
Кездесулердің негізгі мақсаты – мамандарды даярлау сапасын арттыруға және білім беру үдерісін саланың нақты қажеттіліктерімен тығыз ықпалдастыруға бағытталған перспективалы ынтымақтастық бағыттарын талқылау.
Келіссөздер барысында студенттердің өндірістік практикасы мен тағылымдамаларын ұйымдастыру, дуальды оқытуды дамыту, компания өкілдерінің білім беру бағдарламаларын жетілдіруге қатысуы, бірлескен білім беру және өндірістік жобаларды іске асыру, сондай-ақ студенттердің кәсіби дамуы мен түлектерді одан әрі жұмыспен қамту мүмкіндіктерін кеңейту мәселелері қарастырылды.
Кездесулер барысында еңбек нарығының заманауи талаптарына сай кадрлар даярлау мәселесіне ерекше назар аударылды. Жұмыс берушілермен өзара іс-қимыл Университетке білім беру бағдарламаларын қалыптастыру және практикаға бағдарланған оқытуды дамыту кезінде өндірістің өзекті міндеттері мен технологиялық өзгерістерді ескеруге мүмкіндік береді.
Кәсіпорындарға бару да жұмыс кездесулерінің маңызды бөлігіне айналды. Өндірістік үдерістермен танысу және компания өкілдерімен тікелей пікір алмасу ынтымақтастық перспективаларын практикалық деңгейде талқылауға және одан әрі бірлескен жұмыстың негізгі бағыттарын айқындауға мүмкіндік берді.
ALT Университеті үшін жетекші кәсіпорындармен серіктестік – іргелі білімі, заманауи кәсіби құзыреттері және практикалық дағдылары бар, еңбек нарығында сұранысқа ие мамандарды даярлаудың негізгі құралдарының бірі.
Университет «Қамқор Локомотив», KEGOC және DAR RAIL компанияларының басшылығы мен ұжымдарына ашық диалог, қонақжайлық және ұзақ мерзімді ынтымақтастықты дамытуға қызығушылық танытқаны үшін алғыс білдіреді.
Өткізілген кездесулер білім мен өндіріс арасындағы өзара байланысты нығайту жолындағы кезекті маңызды қадам болды. ALT Университеті салалық компаниялармен серіктестік қатынастарды одан әрі дамытып, студенттер үшін жаңа мүмкіндіктер қалыптастыруды және көлік пен энергетика салаларының кадрлық әлеуетін дамытуға бағытталған бірлескен бастамаларды іске асыруды жалғастырады.
Автор: Абдикаликова Л. Б.
