ALT Университетінің қабырғасында «Қазақстан темір жолы» ҰК» АҚ өкілдерімен дуальды оқытуды дамыту және теміржол саласы үшін білікті мамандар даярлау мәселелеріне арналған жұмыс кездесуі өтті.
Кездесу университет пен теміржол саласының жетекші кәсіпорны арасындағы өзара іс-қимылды одан әрі нығайтудағы маңызды қадам болды. Жұмыс берушілермен тығыз байланыс студенттердің кәсіби құзыреттерін қалыптастыру кезінде саланың нақты қажеттіліктерін ескеруге мүмкіндік береді.
Кездесу барысында келесі білім беру бағдарламалары бойынша студенттерді дуальды оқытуды ұйымдастыру мүмкіндіктері талқыланды:
- Автоматтандыру және басқару;
- Радиоэлектроника, электроника және телекоммуникациялар;
- Электр энергетикасы, IT-энергетика;
- Теміржол жолы және жол шаруашылығы;
- Көпірлер, тоннельдер және метрополитендер;
- Тасымалдауды, қозғалысты ұйымдастыру және көлікті пайдалану.
Дуальды оқыту – өндірістің нақты жағдайларына бейімделген мамандарды даярлаудың тиімді құралдарының бірі. Бұл формат студенттерге университетте алған теориялық білімін кәсіпорындардағы практикалық оқытумен ұштастырып, кәсіби дағдыларын жетілдіруге және болашақ мамандығының ерекшеліктерін тереңірек түсінуге мүмкіндік береді.
Кездесу барысында өндірістік практиканы ұйымдастыру, студенттердің тәжірибеден өту орындарын анықтау, оларды саланың тәжірибелі мамандарына бекіту және тәлімгерлік мәселелеріне ерекше назар аударылды. Сондай-ақ студенттердің таңдаған білім беру бағдарламасына сәйкес практикалық тәжірибе алуына жағдай жасау мақсатында университет пен «Қазақстан темір жолы» ҰК» АҚ кәсіпорындары арасындағы өзара іс-қимылды үйлестіру мүмкіндіктері қарастырылды.
ALT Университеті үшін «Қазақстан темір жолы» ҰК» АҚ-мен ынтымақтастықтың стратегиялық маңызы зор. Университет көлік және теміржол салалары үшін қажетті мамандарды даярлайтын кең ауқымды білім беру бағдарламаларын жүзеге асырады және жұмыс берушілермен өзара іс-қимыл тетіктерін жүйелі түрде дамытып келеді.
Студенттердің практикалық даярлығын жетілдіру, кәсіпорын өкілдерінің білім беру үдерісіне қатысуы, дуальды оқытуды дамыту және еңбек нарығының талаптарына сәйкес кәсіби құзыреттерді қалыптастыру – заманауи кадр даярлау жүйесінің маңызды бағыттарының бірі.
Кездесу қорытындысы бойынша тараптар дуальды оқыту саласындағы ынтымақтастықты одан әрі дамытуға және бірлескен бастамаларды жүзеге асыруға қызығушылық танытты.
ALT Университеті көлік саласының жетекші кәсіпорындарымен серіктестікті нығайтуды жалғастыра отырып, студенттерге кәсіби дамуға, практикалық тәжірибе жинақтауға және мансап жолын табысты бастауға жаңа мүмкіндіктер қалыптастыруда.
Автор: Абдикаликова Л. Б.
