Мұхамеджан Тынышпаев атындағы ALT University-де Үрімжі кәсіптік университетінің (ҚХР) студенттеріне арналған халықаралық Summer School – 2026 өз мәресіне жетті. Бұл жоба екі жоғары оқу орны арасындағы ынтымақтастық туралы меморандум аясында ұйымдастырылды.
Бес күн бойы Қытай Халық Республикасынан келген 15 студент заманауи технологиялармен, университеттің ғылыми инфрақұрылымымен және Қазақстанның жоғары білім беру жүйесімен танысуға бағытталған ауқымды білім беру және мәдени бағдарламаға қатысты.
Summer School аясында қатысушылар ALT University-дің заманауи зертханалары мен оқу орталықтарын аралап, жасанды интеллект, машиналық оқыту, блокчейн технологиялары, цифрлық экономика және 3D-модельдеу бойынша дәрістер тыңдап, практикалық сабақтарға қатысты. Әсіресе, дрондарды басқару операторларын даярлайтын мектепке жасалған экскурсия студенттердің үлкен қызығушылығын тудырды. Мұнда олар ұшқышсыз технологиялар мен интеллектуалды жүйелердің мүмкіндіктерін өз көздерімен көрді.
Мәдени-танымдық іс-шаралар бағдарламаның ажырамас бөлігіне айналды. Қонақтар үшін Алматы қаласы бойынша экскурсиялар ұйымдастырылып, олар Қазақстан Республикасының Ұлттық музейін, «Медеу» биік таулы спорт кешенін және қаланың басқа да көрікті жерлерін тамашалады.
Summer School қорытындысы бойынша қатысушылар бағдарламаның жоғары деңгейде ұйымдастырылғанын, сабақтардың практикалық маңыздылығын және халықаралық білім беру ортасында жаңа машықтарды меңгеру мүмкіндігін ерекше атап өтті. Сонымен қатар, Summer School тәжірибе алмасудың, мәдениетаралық диалогты дамытудың және Қазақстан мен Қытай жастары арасындағы достық байланысты нығайтудың тиімді алаңына айналды.
Бағдарлама салтанатты марапаттау рәсімімен аяқталды. Шара барысында студенттерге Summer School – 2026 курсын сәтті өткені туралы сертификаттар мен ALT University атынан естелік сыйлықтар табыс етілді.
Халықаралық Summer School – 2026 өткізу Қазақстан Республикасы Ғылым және жоғары білім министрлігінің жоғары білімді интернационалдандыру, академиялық ұтқырлықты дамыту және халықаралық ынтымақтастықты кеңейту жөніндегі басым бағыттарына толықтай сай келеді. Мұндай жобалар шетелдік жоғары оқу орындарымен серіктестікті нығайтуға, мәдениетаралық өзара іс-қимылды дамытуға және студенттердің академиялық әрі кәсіби өсуіне жаңа мүмкіндіктер туғызуға септігін тигізеді.
ALT University халықаралық білім беру бастамаларын белсенді дамытуды, шетелдік серіктестермен академиялық байланыстарды кеңейтуді және студенттердің жаһандық білім беру кеңістігіне кірігуі үшін барлық жағдайды жасауды жалғастыра береді.
Автор: Алия Ерлан
