Кездесу БҰҰ-ның Тұрақты даму мақсатының 4-бағытына — «Сапалы білімге» және 9-бағытына — «Индустрияландыру, инновациялар және инфрақұрылымға» сәйкес келеді. Іс-шара заманауи цифрлық құзыреттерді, қолданбалы оқытуды және инновациялық шешімдерді әзірлеу дағдыларын дамытуға бағытталған.
2026 жылғы 15 қазанда ALT University-де IT мамандықтарының студенттеріне арналған вайбкодинг және жасанды интеллект агенттерінің көмегімен цифрлық жүйелер әзірлеу тақырыбында қонақ дәрісі өтті. Дәрісті Energy System Logistics компаниясының директоры Нұрғалиев Жангирхан Сапарұлы өткізді.
Energy System Logistics — Astana Hub резиденті және энергетика саласын автоматтандыруға арналған цифрлық шешімдерді әзірлейтін компания. Команда электр энергиясының көтерме нарығындағы ірі тұтынушылармен жұмыс істеп, нарықты талдайды және клиенттерге жүздеген миллионмен өлшенетін қаражатты үнемдеуге көмектеседі.
Дәрістің негізгі идеясы — студенттер нақты цифрлық өнімдерді оқу аяқталғаннан кейін ғана емес, қазірден бастап әзірлей алады. Жасанды интеллект агенті кодтың алғашқы нұсқасын жылдам құрастырады, ал әзірлеушінің міндеті — жүйенің құрылымын түсіну, кодты тексеру, қателерді түзету және өнімді нақты пайдаланушыға дейін жеткізу.
Қатысушылар идеяны жұмыс істейтін жүйеге айналдыру кезеңдерімен танысты: міндетті нақтылау, жүйе сызбасын жасау, шекаралар мен деректерді белгілеу, агенттің нұсқасын тексеру, артық функцияларды қысқарту, өнімді іске қосу және оны нақты пайдаланушымен сынау.
Спикер клиенттік сервистер, WhatsApp-тағы CRM, мобильді интерфейстер, жеке қаржы трекерлері, қойма хабарламалары және энергетика саласындағы деректермен жұмыс істейтін жүйелер сияқты студенттерге қолжетімді жобалардың мысалдарын көрсетті.
Дәріс барысында студенттерге шағын мәселені таңдап, промпт жазудан бұрын жүйенің сызбасын құру, агент жасаған кодты мұқият оқу және өнімді басқа адамға тексеруге беру ұсынылды. Мұндай жұмыс қызығушылықты, талапшылдықты және жобаны іске қосуға дейін жеткізу қабілетін дамытады.
Спикер стартаптарға арналған бағдарламалық өнімдерді әзірлеу тәжірибесімен де бөлісті. Компания кәсіпкерлерге идеяны нақтылаудан бастап техникалық шешім таңдауға дейін тегін көмек көрсететін Telegram қауымдастығын жүргізеді. Қауымдастықта күн сайын бағдарламалық өнімдерге арналған жетіге жуық жаңа идея жарияланады.
Қонақ дәрісі бағдарламалау, жасанды интеллект және цифрлық өнімдерді әзірлеуге қызығушылық танытатын IT студенттері үшін пайдалы тәжірибе алаңына айналды.
Автор: Өмірбекова З. М.
