«Ақпараттық жүйелер» мамандығы бойынша білім алатын ALT University студенті Камила Дастанқызы Алиева WorldSkills Shanghai 2026 кәсіби шеберлік бойынша 48-ші әлем чемпионатында Best of Nation арнайы марапатына ие болды.
WorldSkills — кәсіби шеберлікті дамыту және жұмысшы әрі техникалық мамандықтардың беделін арттыру үшін қатысушыларды, сарапшыларды, жұмыс берушілерді және білім беру ұйымдарын біріктіретін халықаралық қозғалыс. 48-ші әлем чемпионаты Шанхай қаласында 2026 жылғы 22–27 қыркүйек аралығында өтті. Жарысқа 70-тен астам ел мен аймақтан 1 400-ге жуық жас маман қатысып, 64 құзыреттілік бойынша бақ сынады.
Камила Алиева Қазақстан намысын «Цифрлық интерактивті медиа дизайны» (Digital Interactive Media Design) құзыреттілігі бойынша қорғады. Ол 2026 жылы алғаш рет WorldSkills бағдарламасына енгізілген осы жаңа бағыттың қатысушыларының бірі болды. Бұл бағыт дизайнды, цифрлық технологияларды және цифрлық контенттен бастап интерфейстер мен мультимедиялық өнімдерге дейінгі интерактивті пайдаланушы шешімдерін жасауды ұштастырады.
Чемпионат қорытындысы бойынша Камила Алиева Best of Nation арнайы марапатын иеленді. WorldSkills мәліметтері бойынша, бұл марапат әр елдің немесе аймақтың өкіліне жоғары шеберлік деңгейін, төзімділікті және WorldSkills қозғалысының рухын ең үздік түрде көрсеткен өнері үшін беріледі.
«Цифрлық интерактивті медиа дизайны» құзыреттілігінде әртүрлі елдердің өкілдері бақ сынасты. Қатысушылар цифрлық құралдармен жұмыс істеу дағдыларын ғана емес, сонымен бірге интерактивті шешімдерді жасау үшін дизайнды, технологияларды және шығармашылық тәсілді қолдану қабілетін де көрсетуі қажет болды.
48-ші әлем чемпионатында Қазақстан атынан 31 құзыреттілік бойынша 33 студент қатысты. Жарыс қорытындысы бойынша ел құрамасы сегіз марапатқа ие болды, оның ішінде бір қола медаль, кәсібилігі үшін алты медаль және Камила Алиева алған Best of Nation марапаты бар.
ALT University үшін Камиланың бұл жетістігі ерекше маңызды. WorldSkills-ке қатысу, сондай-ақ, техникалық біліммен қатар цифрлық контентпен, интерфейстермен, мультимедиялық шешімдермен және пайдаланушы тәжірибесімен (UX/UI) жұмыс істеу дағдылары барған сайын маңызды мәнге ие болып отырған цифрлық технологиялар саласындағы мамандарға қойылатын заманауи талаптарды көрсетеді.
ALT University Камила Алиеваны халықаралық танымалдылығымен құттықтайды және оған жаңа кәсіби жетістіктер, қызықты жобалар мен жеңістер тілейді!
Автор: Алия Ерлан
