Мамыр айында Логистика және көлік университетінің Өмір қауіпсіздігі циклының оқытушыларымен бірге «Техногендік және санитариялық-экологиялық қауіпсіздік» білім беру бағдарламасының 1-курс студенттері Алматы қаласының Бас ботаникалық бағында ұйымдастырылған танымдық экологиялық іс-шара — экотрекке қатысты.
Іс-шара барысында қатысушылар өсімдіктер әлемінің алуан түрлілігімен, әртүрлі табиғи-климаттық аймақтардың экожүйелерінің ерекшеліктерімен және ботаникалық бақтардың биоалуантүрлілікті сақтаудағы рөлімен танысты. Студенттер тақырыптық экспозицияларды аралап, ағаш және бұта өсімдіктерінің коллекцияларымен танысып, олардың шығу тегі, экологиялық маңызы және қоршаған орта жағдайларына бейімделу ерекшеліктері туралы мәлімет алды.
Табиғатты қорғау, табиғи ресурстарды ұтымды пайдалану және қазіргі экологиялық сын-қатерлер жағдайында биоалуантүрлілікті сақтау мәселелеріне ерекше назар аударылды. Экотрек студенттердің экология саласындағы теориялық білімдерін кеңейтіп қана қоймай, табиғатты қорғау қызметі мен экологиялық ағартудың маңыздылығын тәжірибе жүзінде түсінуге мүмкіндік берді.
Осындай іс-шаралар жастардың экологиялық мәдениетін қалыптастыруға, қоршаған ортаға жауапкершілікпен қарауын дамытуға және Біріккен Ұлттар Ұйымының Тұрақты даму мақсаттарын жүзеге асыруға ықпал етеді. Атап айтқанда, ТДМ 4 «Сапалы білім», ТДМ 13 «Климаттың өзгеруіне қарсы күрес» және ТДМ 15 «Құрлық экожүйелерін сақтау» мақсаттарын қолдайды.
Экотрекке қатысу студенттер үшін пайдалы әрі шабыттандыратын тәжірибе болып, оқу үдерісін Алматы қаласының бірегей табиғи мұрасымен тәжірибелік тұрғыдан танысумен ұштастыруға мүмкіндік берді.
Автор: Бимагамбетова Л. Н.
