Қазақстанның машина жасау саласы – елдің индустриялық дамуының негізгі қозғаушы күштерінің бірі. Бүгінде өндірісті жергіліктендіруге, заманауи технологияларды енгізуге және жоғары технологиялық кәсіпорындарда еңбек ете алатын инженерлік кадрларды даярлауға ерекше көңіл бөлінуде. Осындай жағдайда жоғары оқу орындары мен өндірістік кәсіпорындар арасындағы серіктестікті нығайту еңбек нарығында сұранысқа ие, бәсекеге қабілетті мамандарды даярлаудың маңызды факторы болып табылады.
Еліміздің жетекші техникалық жоғары оқу орындарының бірі ретінде М. Тынышбаев атындағы ALT University болашақ инженерлерді тәжірибеге бағытталған оқытуды, өнеркәсіптік кәсіпорындармен өзара ынтымақтастықты кеңейтуді және студенттердің кәсіби қалыптасуына қолайлы жағдай жасауды басты назарда ұстайды.
Осы бағыттағы кезекті маңызды қадам – ALT University мен «КазТехна» ЖШС арасында ынтымақтастық туралы меморандумға қол қойылуы болды.
«КазТехна» ЖШС – әлемге әйгілі Yutong брендінің заманауи қалалық, қалааралық және туристік автобустарын құрастыруға маманданған қазақстандық машина жасау кәсіпорны. Компания озық өндірістік технологияларды енгізіп, шығарылған техниканы сервистік қызметпен қамтамасыз етеді және Қазақстандағы қоғамдық көлік жүйесін жаңғырту мен отандық автомобиль жасаудың дамуына елеулі үлес қосып келеді.
Меморандум аясында тараптар ұзақ мерзімді ынтымақтастықтың бірқатар басым бағыттарын айқындады. Атап айтқанда, студенттердің өндірістік және дипломалды тәжірибесін ұйымдастыру, дуальды оқыту элементтерін дамыту, түлектерді жұмысқа орналастыруға жәрдемдесу, бірлескен ғылыми-зерттеу жобаларын жүзеге асыру, сондай-ақ кәсіпорын мамандарының қатысуымен семинарлар, шеберлік сабақтары мен қонақ дәрістерін өткізу жоспарлануда.
Сонымен қатар, серіктестік жұмыс беруші өкілдерінің университеттің білім беру бағдарламаларын жетілдіруге қатысуын, кәсіби тәжірибе алмасуды және автомобиль жасау, машина жасау, өндірістік процестерді цифрландыру мен жаңа буын инженерлік кадрларды даярлау салаларындағы бірлескен бастамаларды іске асыруды көздейді.
«КазТехна» ЖШС-мен ынтымақтастық ALT University студенттеріне заманауи өндірісте тәжірибеден өтуге, жолаушылар көлігін құрастырудың озық технологияларын меңгеруге, нақты өндірістік процестерге қатысуға және тәжірибелі инженерлердің жетекшілігімен кәсіби құзыреттерін дамытуға мүмкіндік береді.
Меморандумға қол қою ALT University-дің Қазақстанның жетекші өнеркәсіптік кәсіпорындарымен серіктестікті одан әрі нығайтуға деген ұмтылысын айқындайды және еліміздің машина жасау мен көлік саласының тұрақты дамуына үлес қосатын бәсекеге қабілетті инженерлерді даярлауға бағытталған.
Автор: Абдикаликова Л. Б.
