БҰҰ-ның Тұрақты даму мақсаттарын іске асыру аясында Инклюзивті білім беру және менталдық денсаулық офисі психологиялық саулықты нығайтуға, қауіпсіз әрі қолайлы университеттік орта қалыптастыруға бағытталған Практикалық психология апталығын ұйымдастырды.
Жобаның бастамашысы әрі жетекшісі — Офис басшысы Шабденова Дария Рахималиевна. Ұйымдастырушылық қолдауды психолог-консультант Қапар Нурхан Аманжолұлы көрсетті.
Алғашқы екі күн жеке консультациялар мен коммуникативтік дағдыларды және командалық өзара әрекеттестікті дамытуға арналған экспресс-тренингтерге арналды. Жұмысқа Елена Владимировна Мусихина жетекшілік ететін Insight студенттік ғылыми-практикалық бірлестігінің психология бағыты бойынша тәжірибеден өтіп жүрген 40 студенті қатысты. Елена Владимировна — психология ғылымдарының докторы, педагогика ғылымдарының кандидаты, практик-психолог және дефектолог.
Қатысушылар мамандармен дағдарыстық жағдайлар, эмоциялық күйіп кету, қорқыныштар, отбасылық қиындықтар, тұлғааралық қақтығыстар және басқа да алаңдататын мәселелерді талқылады. Консультациялар барысында арт-терапия, құм терапиясы, метафоралық ассоциативтік карталар және ертегі терапиясы қолданылды.
Мұндай формат психологиялық қиындықтарды уақтылы анықтауға, ұсынымдар беруге және қажет болған жағдайда одан әрі жеке немесе топтық қолдау ұйымдастыруға мүмкіндік береді.
Менталдық денсаулыққа қамқорлық мәдениетін қалыптастыруға үлес қосқан мамандарға, тәжірибеден өтуші студенттерге және барлық қатысушыларға алғыс білдіреміз!
Автор: Қапар Нурхан, Инклюзивті білім беру және менталдық денсаулық офисі
