БҰҰ-ның Тұрақты даму мақсаттарын — ТДМ 3 «Жақсы денсаулық және әл-ауқат», ТДМ 4 «Сапалы білім беру», ТДМ 10 «Теңсіздікті азайту», ТДМ 16 «Бейбітшілік, әділдік және тиімді институттар» және ТДМ 17 «Тұрақты даму жолындағы әріптестік» мақсаттарын іске асыру аясында Инклюзивті білім беру және менталдық денсаулық кеңсесі Практикалық психология апталығының төртінші күнін өткізді. Іс-шаралар дағдарыстық және дезадаптивті мінез-құлықпен жұмыс істеуге, психологиялық әл-ауқатты нығайтуға және кәсіби ортада тиімді өзара әрекеттесу дағдыларын дамытуға арналды.
Іс-шара Инклюзивті білім беру және менталдық денсаулық кеңсесі басшысы Шабденова Дария Рахималиевна мен психолог-консультант Қапар Нурхан Аманжолұлының бастамасымен ұйымдастырылды. Іс-шара HR бөлімінің персоналмен жұмыс жөніндегі менеджері Қазбек Камиля Қалижанқызымен бірлесіп өткізілді.
Практикалық психология апталығының бағдарламасы аясында «Дағдарыстық және дезадаптивті мінез-құлықпен жұмыс істеу» тақырыбында семинар-тренинг өткізілді. Оны ALT мамандары ALT Қауіпсіздік қызметінің қызметкерлеріне арнап өткізіп, тренинг барысында практикалық жаттығулар мен проективтік әдістемелерді қолданды.
Қатысушылар дағдарыстық мінез-құлықтың ерекшеліктерін, бейімделу қиындықтарының ықтимал себептерін және білім алушылармен өзара әрекеттесудің тиімді тәсілдерін қарастырды. Мазасыздық белгілерін дер кезінде анықтауға, сындарлы қарым-қатынас дағдыларын дамытуға және қауіпсіз әрі сенімді ахуал қалыптастыруға ерекше назар аударылды.
Психологиялық тұрақтылық адам өзін түсінуден басталып, өзгелерді тыңдау, түсіну және қолдау қабілеті арқылы көрініс табады. Практикалық психология апталығының төртінші күніне қатысқан барша қатысушыларға алғыс білдіреміз!
Автор: Қапар Нурхан, Инклюзивті білім беру және менталдық денсаулық офисі
