08.04.2026 ж. — Мұхамеджан Тынышпаев атындағы ALT Университетінде «Ғылым айы» (1-30 сәуір аралығында) іс-шаралар жоспары аясында «Сәулет-құрылыс инженерия» (СҚИ) кафедрасының ұйымдастыруымен кезекті ғылыми-әдістемелік семинар болып өтті.
Бұл іс-шара БҰҰ-ның Тұрақты даму мақсаттарының бірі — ТДМ 4: Сапалы білім беру бағытын іске асыруға бағытталған. Сапалы білім тек оқу процесімен шектелмейді, Профессор-оқытушылар құрамы мен жас ғалымдардың ғылыми әлеуетін халықаралық деңгейге көтеруді және алдыңғы қатарлы зерттеу әдістерін меңгеруді көздейді.
Шараның барысы: Семинардың ашылу салтанатында «СҚИ» кафедрасының меңгерушісі, ALT қауымдастырылған профессоры Мурзалина Г.Б. сөз сөйледі. Ол халықаралық ғылыми кеңістікке интеграциялану — заманауи білім берудің ажырамас бөлігі екенін атап өтті.
Семинар тақырыбы: «Ғылыми мақалалар жазу, журналдарды таңдау және халықаралық рецензиялау процесі: Scopus және Web of Science талаптары». Баяндамашы: «СҚИ» кафедрасының сениор-лекторы Оразбаева Д.А.
Талқыланған негізгі мәселелер:
- IMRAD стандарты: Мақаланы халықаралық талаптарға сай құрылымдау (презентация материалдары қазақ тілінде ұсынылды);
- Scimagojr платформасы: Журналдардың рейтингін (Q1-Q4) анықтау және дұрыс таңдау;
- Рецензиялау процесі: Халықаралық сарапшылардың пікірлерімен жұмыс істеу.
Семинар қатысушылары ғылыми зерттеулерді жариялаудың жаңа құралдарын меңгеріп, ТДМ 4 аясында білім мен ғылымның сапасын арттыруға бағытталған практикалық кеңестер алды.
«СҚИ» кафедрасы ғылым жолындағы ізденістеріңізге сәттілік тілейді!
