Университетке инфрақұрылымдық құрылыс, көлік инженериясы және ауқымды инвестициялық жобаларды жүзеге асыру саласындағы жетекші халықаралық компаниялардың бірі – China Harbour Engineering Company (CHEC) делегациясы арнайы сапармен келді. Бұл кездесу академиялық орта мен өндіріс арасындағы байланысты нығайтуға, сондай-ақ болашақ мамандарды даярлау ісінде өзара ынтымақтастықты дамытуға бағытталған маңызды қадам болды.
Сапар барысында компания өкілдері университеттің білім беру және ғылыми-зерттеу инфрақұрылымымен танысып, мамандандырылған зертханаларды, оқу аудиторияларын және ғылыми орталықтарды аралады. Ерекше назар тәжірибеге бағытталған оқытуға, инженерлік құзыреттерді дамытуға және заманауи технологияларды білім беру процесіне енгізуге аударылды.
Кездесу барысында тараптар құрылыс, көлік және инженерлік салалар үшін білікті кадрлар даярлау бағытындағы ынтымақтастық перспективаларын талқылады. CHEC өкілдері еңбек нарығының заманауи талаптарына жауап беретін, теориялық біліммен қатар практикалық дағдыларды меңгерген мамандарды даярлауда жоғары оқу орындары мен бизнестің өзара байланысының маңыздылығын атап өтті.
Серіктестік аясында компания мамандарының білім беру процесіне қатысуы, қонақ дәрістері мен шеберлік сабақтарын өткізуі, студенттердің өндірістік тәжірибелері мен тағылымдамаларын ұйымдастыруы, сондай-ақ кәсіби құзыреттерді дамытуға бағытталған бірлескен жобаларды жүзеге асыру көзделген. Әлемдік деңгейдегі инженерлік-құрылыс компаниясымен ынтымақтастық студенттерге инфрақұрылымдық жобаларды жобалау, салу және басқару саласындағы озық халықаралық тәжірибемен танысуға мүмкіндік береді.
Кездесу қорытындысы бойынша университет пен China Harbour Engineering Company арасында Ынтымақтастық туралы меморандумға қол қойылды. Құжат білім беру, ғылым және өндіріс арасындағы ықпалдастықты нығайтуға, сондай-ақ жаһандық еңбек нарығында бәсекеге қабілетті мамандар даярлауға бағытталған ұзақ мерзімді серіктестіктің негізін қалайды.
Меморандумға қол қою университеттің жетекші халықаралық компаниялармен байланысын кеңейтуге және студенттер үшін тәжірибелік оқыту, кәсіби даму және табысты мансап құру мүмкіндіктерін арттыруға деген ұмтылысын көрсетеді.
Автор: Абдикаликова Л. Б.
