ALT UNIVERSITY жоғары оқу орнының тарихы 1931 жылдан бастау алады. Сол жылы Алматы қаласында Түркістан–Сібір темір жолы дирекциясының бастамасымен және Ташкент қаласында орналасқан Орта Азия теміржол көлігі инженерлері институтының (САЗИИТ) бұйрығына сәйкес оның филиалы ашылды. Филиалдың басты мақсаты – Түркістан–Сібір магистралі үшін жол шаруашылығы, механика және пайдалануға беру мамандықтары бойынша техникалық мамандар даярлау болды. Бұл оқиға Қазақстандағы көлік саласына бағытталған инженерлік білім берудің негізін қалады.

1957 жылы аталған филиал оқу-кеңестік пунктке (ОКП) ауыстырылды, ал 1967 жылдың 1 қазанынан бастап ол Ташкент теміржол инженерлері институтының (ТашИИТ) Алматы филиалы ретінде қайта құрылды.

1976 жылғы 20 мамырда Алматы филиалының базасында Алматы теміржол көлігі инженерлері институты (АлИИТ) ресми түрде қалыптасты.

1991 жылғы 1 қаңтарда Өскемен құрылыс және жол институтының Алматы филиалы негізінде Алматы автомобиль-жол институты (ААДИ) ашылды.

1996 жылғы 7 мамырда көлік саласына кадрлар даярлау мақсатында екі жоғары оқу орны — АлИИТ және ААДИ біріктіріліп, Қазақ көлік және коммуникациялар академиясы (ҚазККА) құрылды. Бұл құрылымдық бірігу көлік және логистика саласының ұлттық қажеттіліктеріне жауап беретін жоғары сапалы мамандарды даярлау ісін кешенді жүргізуге мүмкіндік берді.

2000 жылғы 23 мамырда Академияға еліміздің алғашқы теміржол инженері, қоғам және мемлекет қайраткері, Түркістан–Сібір темір жолының жобалаушылары мен құрылысшыларының бірі Мұхамеджан Тынышпаевтың есімі берілді.

2000–2020 жылдар аралығындағы кезеңде университет кең ауқымды институционалдық трансформация кезеңінен өтті. Бұл үдеріс жаңа білім беру стандарттарының енгізілуімен, халықаралық серіктестік желісінің кеңеюімен және оқу үдерісінің цифрландырылуымен сипатталды.

2021 жылғы 27 қаңтарда оқу орнының заңды атауы қайта тіркеліп, «М.Тынышпаев атындағы Қазақ көлік және коммуникациялар академиясы» акционерлік қоғамы болып табылатын мекеме атауы «Логистика және көлік академиясы» акционерлік қоғамы болып өзгертілді.

2024 жылғы 22 сәуірде оқу орнына жаңа мәртебе беріліп, қазіргі атауы — «Мұхамеджан Тынышпаев атындағы ALT University» акционерлік қоғамы.

Бүгінгі таңда ALT UNIVERSITY – Қазақстан Республикасындағы көлік, логистика, цифрлық экономика және инженерия салалары бойынша кадрлар даярлауға маманданған жетекші техникалық жоғары оқу орны.

Университет миссиясы:

Көлік саласын жүйелі түрде жаңғырта алатын, инфрақұрылымдық жобаларды дамытатын және елдің орнықты дамуына қатысты кешенді мәселелерді шешуге қабілетті жаңа буын инженерлерін, логистерін және менеджерлерін қалыптастыру.

ALT UNIVERSITY көп салалы жоғары оқу орны, мұнда:

— 8 бакалавриат бағыты бойынша 44 білім беру бағдарламасы;
— 7 магистратура бағыты бойынша 32 білім беру бағдарламасы;
— 3 докторантура бағыты бойынша 8 білім беру бағдарламасы бойынша  білім беру жүзеге асырылады.

Ғылыми әлеуеті:

Университеттің профессорлық-оқытушылық құрамы жоғары біліктілікке ие. Олардың көпшілігі  ғылыми мектептердің негізін қалаған, отандық және халықаралық деңгейде танылған зерттеушілер, ғылым кандидаттары мен докторлары, монографиялар мен ғылыми мақалалардың авторлары.

PhD дәрежесін қорғауға арналған Диссертациялық кеңес қызмет атқарады. Сонымен қатар, университет 20-дан астам шетелдік мемлекеттердің жетекші жоғары оқу орындарымен, ғылыми-зерттеу институттарымен және салалық ұйымдарымен ынтымақтастық орнатқан. Бұл елдер қатарына Германия, Франция, Испания, Финляндия, Қытай, Оңтүстік Корея, Польша, Латвия, Литва, Болгария, Ресей, Украина, Беларусь, Армения, Әзірбайжан, Тәжікстан, Өзбекстан және Қырғызстан кіреді.

Білім беру кеңістігін кеңейту:

ALT University Қазақстанның ірі қалаларында — Астана, Алматы, Ақтау, Ақтөбе және Шымкент қалаларында колледждер желісін дамытып, үздіксіз инженерлік білім беру жүйесін қамтамасыз етуде.

ALT UNIVERSITY – бұл:

• заманауи білім беру инфрақұрылымына ие, қолданбалы бағыттағы академиялық орта;
• көлік және логистика саласының стратегиялық әріптесі;
• инженерлік дәстүрлер мен цифрлық трансформация арасындағы инновациялық көпір.