2026 жылғы 1 қазанда Тәуелсіз Мемлекеттер Достастығына қатысушы мемлекеттердің Үйлестіруші көлік кеңесі жанындағы Білім және ғылым кеңесінің отырысы өтті. Отырыстың негізгі алаңы Мәскеу қаласындағы Ресей көлік университеті (РКУ (МИИТ)) болды.
Отырыс жұмысына онлайн форматта Мұхамеджан Тынышпаев атындағы ALT University Логистика және көлік департаментінің профессоры, техника ғылымдарының докторы Бекжанова Сауле Ертаевна қатысты.
Сауле Ертаевна «Білім беру бағдарламасынан нақты жобаға дейін: көлік университеттері саланың жаңа міндеттері үшін кадрларды қалай даярлайды» тақырыбында баяндама жасады. Аталған бағыт аясында нақты салалық міндеттерді білім беру үдерісіне енгізу, жобалық оқытуды дамыту, мамандар даярлауға жұмыс берушілерді тарту, практикалық даярлық пен тағылымдамалар, сондай-ақ ТМД-ға қатысушы мемлекеттердің көлік жоғары оқу орындары бірлесіп жүзеге асыра алатын бастамалар талқыланды.
Өз баяндамасында профессор цифрландыру, автоматтандыру және көлік-логистикалық жүйелердің күрделенуі жағдайында көлік саласына кадрлар даярлауды трансформациялау бойынша ALT University ұстанымын таныстырды. Қазіргі заманғы көлік университеті теориялық білім берумен ғана шектелмей, нақты салалық міндеттерді шеше алатын, негізделген шешімдер қабылдайтын, заманауи цифрлық құралдарды қолданатын және инфрақұрылымдық, логистикалық әрі технологиялық жобаларды іске асыруға қатыса алатын мамандарды даярлауы қажеттігі атап өтілді.
Баяндамада нақты өндірістік міндеттерді тікелей білім беру үдерісіне енгізуге ерекше назар аударылды. Мұндай тәсіл дәстүрлі оқу тапсырмаларынан нақты деректермен жұмыс істеуге, көлік жүйелерін талдауға, әртүрлі сценарийлерді модельдеуге және нақты инженерлік әрі ұйымдастырушылық шешімдер әзірлеуге көшуге мүмкіндік береді.
Баяндаманың маңызды бағыттарының бірі университет, студенттер және жұмыс берушілер арасындағы өзара байланысты дамыту болды. Жобалық оқытуды білім беру бағдарламасының барлық кезеңдерін қамтитын элемент ретінде қарастыру, ал көлік саласындағы кәсіпорындарды білім беру бағдарламаларының мазмұнын қалыптастырудан бастап практикалық сабақтар өткізуге және студенттік жобалар үшін нақты өндірістік міндеттер ұсынуға дейін мамандар даярлау үдерісінің тікелей қатысушылары ретінде тарту ұсынылды.
Баяндаманың жеке бөлімі ТМД-ға қатысушы мемлекеттердің көлік университеттері арасындағы ынтымақтастықты дамытуға арналды. Перспективалы бағыттар ретінде бірлескен студенттік жобалық командалар, желілік білім беру модульдері, академиялық ұтқырлық және қысқа мерзімді тағылымдамалар, виртуалды зертханалар, бірлескен хакатондар мен кейс-чемпионаттар, сондай-ақ магистрлік және докторлық зерттеулерге бірлесіп жетекшілік ету атап өтілді.
ALT University одан әрі ынтымақтастықты дамыту үшін бірқатар практикалық бастамаларды ұсынды. Олардың қатарында ТМД көлік университеттерінің нақты салалық міндеттер банкін, Халықаралық көлік жобалық мектебін және Цифрлық көлік жүйелерінің желілік зертханасын құру, сондай-ақ бірлескен білім беру модульдерін, өзара практикалар мен тағылымдамалар жүйесін дамыту бар.
Баяндаманың негізгі идеясы университетті, студенттерді, кәсіпорындарды, зерттеу зертханаларын, цифрлық білім беру ортасын, кәсіби қауымдастық пен серіктес университеттерді біріктіретін білім беру бағдарламасынан кадрлар даярлаудың толыққанды экожүйесіне көшу болды. Мұндай даярлықтың нәтижесі тек академиялық білім ғана емес, сонымен қатар нақты жобалар, цифрлық модельдер, инженерлік шешімдер және заманауи көлік саласында сұранысқа ие кәсіби құзыреттер болуы тиіс.
Профессор Бекжанова Сауле Ертаевнаның КТК ТМД жанындағы Білім және ғылым кеңесінің отырысына қатысуы ALT University тәжірибесін халықаралық кәсіби алаңда таныстыруға, көлік университеттері арасындағы ынтымақтастықты дамытуға және болашақ көлік саласының мамандарын даярлаудың заманауи тәсілдерімен тәжірибе алмасуға ықпал етеді.
Материал ТДМ 4 — «Сапалы білім», сондай-ақ ТДМ 9 — «Индустрияландыру, инновациялар және инфрақұрылым» және ТДМ 17 — «Тұрақты даму мүддесіндегі әріптестік» мақсаттарымен байланысты.
Автор: Алик Асель
